MARYAM FANTIMOTI: Ban taba jin an ce Shata ko Hassan Wayam sun yi rijista ba, sai mu da aka raina

Zabiya mai muryar azurfa ta fayyace mana asalin ta, wak'ar ta, da ra’ayoyin ta kan al’amura daban-daban

Daga SANI MAIKATANGA

KAMAR yadda mu ka sha fad'a maku, ‘mutanen b'oye’ wani rukunin ’yan fim ne da ke ba da tasu gudummuwar a industiri. Mun kira su haka ne domin ba su fitowa a fim, sai dai su ne za ku ji jarumai masu fitowa a fim su na hawa muryoyin su in za a yi wak'a a fim. Mutanen b'oye mawak'a ne ko makad'a, ko daraktoci da furodusoshi da sauran masu yi wa fim hidima.

Mujallar Fim ta yi tattaki zuwa gidan su shahararriyar zabiyar nan mai muryar azurfa, murya mai ratsa zukatan masoya, mai tsima mutum, wato Maryam Saleh Mohammed, wadda aka fi sani da Maryam Fantimoti. “Akwatin Wak'a,” kamar yadda sarkin barkwanci Ari Baba ya kira Maryam, a shirye ta ke ta yi wak'a a kowane irin yanayi ko lokaci. An ce ko barci ko gyangyad'i ka iske ta na yi, kai ko a yanayin kuka ko dariya, tabbas in ka ce ta rera maka wak'a, to za ta rera.

Mun tattauna da Fantimoti a gidan su da ke unguwar Gyad'i-Gyad'i, kan titin Court Road da ke birnin Kano, wato gidan iyayen ta, inda aka haife ta. Ita Maryam ba ta zuwa ko'ina yawo; in ka gan ta a waje, to an kira ta aiki ne ko kuma za ta zumunci, amma ba za ka tarar da ita a situdiyo ba kamar sauran mawak'a. Ga yadda hirar ta kasance.

Fim: Maryam Fantimoti, menene cikakken sunan ki?
FANTIMOTI: Suna na Maryam Saleh Mohammed, wadda aka fi sani da Fantimoti.

Shekarun ki na haihuwa nawa yanzu?
Ina da shekara 31 a duniya.

A ina aka haife ki?
An haife ni a nan inda ka ke hira da ni, gidan mahaifi na, nan unguwar Court Road, Gyad'i-Gyad'i.

Iyayen ki ’yan asalin ina ne?
Mahaifi na kafin ya rasu d'an Kano ne, to daga bisani Jigawa. Mahaifiya ta kuma ’yar asalin Jihar Katsina ce, garin Funtuwa.

Ya batun karatun boko da na muhammadiyya?
Na’am, wannan tambayar ta yi kyau. Na yi boko, iya firamare, sannan mahammadiyya har na sauke K'ur’ani.

Me ya hana ki ci gaba da karatu daga firamare?
Dokar ’ya’yan gidan mu, ki na gama firamare za a yi miki aure. An yi min aure a 1993, Janairu, 1 ga watan.

A ina ne ki ka yi auren?
A nan Kano. Mijin da na aura d'an Warure ne, cikin birnin Kano, amma mun zauna ne a unguwar Gwale.

Shekarun ku nawa tare da shi, kuma me ya faru ku ka rabu, sannan ’ya’yan ku nawa da shi in kun haihu tare?
Haba, sai ka ce wadda ta shiga siyasa? Ba zan iya tuna ko shekarun mu nawa ba. Miji na ya rasu ne, kuma mu na da ’ya’ya hud'u tare da shi.

Kai, lallai ashe uwar ce ke ta sosai!
Da me ka ke tunani na?

’Ya’yan su na nan da rai?
Akwai Mohammed Auwal, Mohammed Jamilu, Hassana, sai Hussaina - amma ita ta rasu. Su ne ma yanzu ka gan su su na bi na kamar jela!

Ayya! Allah Ya jikan ta.
Amin summa amin.

Bayan mutuwar auren ki ba ki sake yin wani auren ba?
Ah, na yi aure mana. Bayan miji na na farko ya rasu, na auri wani d'an Hotoro. Shekarar mu uku da shi mu ka rabu.

Shi ma mutuwar ya yi ko yaya?
Lokacin zama taren ne ya k'are.

Kun haihu da shi?
A’a.

To ya aka yi ki ka samu kan ki a harkar wakokin industiri?
Na’am, wannnan tambayar taka ta yi min daidai. Bayan miji na na farko ya rasu, sai na ji ya kamata in d'an tab'a wata sana’a. To da yake da ma tun ina Islamiyya na yi wak'ok'in yabon Manzon Allah, wanda na kai wani matsayi da ba na tunani, to mutuwar miji na sai na ji wak'ar fim d'in ‘Dawayya’ wacce Zuwaira ta rera, Ruk'ayya ta hau a fim d'in. Wannan muryar ta ja hankali na, inda ni ma na rera wak'a mai taken “Fantimoti”, wak'a ta ta fim da na k'era ta farko kenan, na kai wa Ali Nuhu, ya ji kuma ya yaba da murya ta, ya ce ta yi. A lokacin kuma Rabi Mustapha ita ce zabiyar mawak'a.

A wane fim aka sa wakar?
Ganin cewa na karb'u, sunan Fantimoti ya bi ni, sai Ali Nuhu ya bar min wak'ar bai sa a fim ba. Ka ji lokacin da na fara wak'a a industiri kenan.

Kin yi akalla wakoki nawa zuwa yanzu tun daga lokacin da ki ka fara?

Zan iya cewa wak'ar siyasa, fim, bikin aure ko na suna, yabon Manzon Allah, wak'ar nishad'i, da sauran su, ak'alla zan iya k'iyastawa ina da wak'ok'i dubu biyar.

Za ki iya lissafa mana wasu daga cikin su?

Ai ba sai na fad'a ba, wak'ar Fantimoti ba ta b'uya; akwai irin su ita wak'ar “Fantimoti”, “Mazaje” na marigayi Ahmed S. Nuhu, ‘Kusufi,’ ‘Uwargida,’ 'Balagaggu,' ‘Zo Mu Zauna,’ ‘Maza Jigida Mata Jigida,’ da kusan duk wasu wak'ok'in maigida na sarkin mawak'a Yakubu Muhammad.

Me ya sa Yakubu ya zama ubangidan ki?

Ai dole a ce da mijin Iya baba, domin shi ne ya fara rubuta min wak'a na rera a industiri; wak'ar “Fantimoti” shi ne ya rubuta min ita.

Duk a wakokin da ki ka yi a wane bangare ne ki ka fi samun alheri?

Alhamdu lillahi, na gode wa Ubangiji, ai ni a kowanne b'angare na samu alkhairi, kuma ina kan samu har yanzu.

Kusan mawaka kowa ya na yin album na wakokin sa. Me ya hana ki yi ke?

Ba komai. Amma ai yanzu na yi guda d'aya na yabon Manzon Allah mai suna “Ceto”. D'aya kuma wani furodusa ne a Minna ya ce min masoya suna ta tambayar album d'i na, ya kamata ni ma in yi, sai na shiga situdiyo na k'era wak'ok'i goma sha biyu na ba shi na ce ya je ya d'au nauyin fitar da shi. Sai ya ce, “Saboda me?” Sai na ce masa ni ba ni da lokacin tsayawa in fitar da wani album.

A ina za a fitar da album din?

Ni ban san wannan nan ba domin shi dai ya san yadda zai tsara abin sa. Ni dai ba ni da lokaci.

Ana ta zuwa ana rijista da Hukumar Tace Finafinai ta Jihar Kano. Ke kin je kin yi kuwa?

Ban je ba, kuma ban yi ba, domin ni dai ba kamfani ne da ni ba, koyaushe ina gidan mu; in ka ga na fita an bugo waya ne ana nema na sannan in fita.

Ai ba kamfani ba, wai a matsayin ki na mawakiya tunda mawaka ma duk su na zuwa suna yi.

Ni ban sani ba, domin ban ga takarda a rubuce ba, kuma ni komai nawa cikin tsari na ke yi. Kai, ni tun da na ke jin mawak'a, na ke jin labarin su, ban tab'a jin an ce Shata ko Garba Supa ko D'ank'wairo ko Hassan Wayam da Barbani Choge sun yi ko suna da rijista ba. Shi kenan kuma don mu aka raina sai a ce sai mun yi wata rijista?

To ai can su watakila ba a Kano su ke ba, kuma wannan dokar gwamnatin Kano ce, ke kuma ga ki a Kano. Ba kya ganin ya kamata ki yi?

To sai dai ko don haka. Amma ni meye na zuwa wani yin rijista - ni da zan yi aure?

Yaushe kuma, a ina, waye kuma mijin?

Kai dai akwai ka da shiga shirgin da ba naka ba! Ina ruwan ka?

Ba kya so mu yi shirin zuwa bikin Fantimoti?

In lokacin ya zo za ku sani ai.

Ki na nufin ki ce duk abubuwan da hukumar su Rabo ke yi ba ki da labari?

Ba sa gaba na, kuma ma ni ban san su ba; ina dai jin wai wai.

Ki ce ba ki taba ganin Rabo ba ma?

A’a, na gan shi wurin k'addamar da wani fim na Asibitin Malam Aminu Kano, ya je, har na rera wa Rabo wak'a.

Meye burin Maryam Fantimoti a wannan harkar?

Alhamdu lillahi, burin Maryam ya cika, sai godiyar Allah. Na samu d'aukaka da jama’a.

Menene kiran ki ko shawarar ki ga abokan sana’ar ki maza da mata?

Babu abin da zan ce sai dai in ce masu Allah ya kare mu a duk inda mu ke, mu so junan mu, mu taimaki ’yan’uwan mu, mu cire k'yashi da hassada.

Maryam Fantimoti, mun gode, sai Allah Ya kai mu lokacin bikin ki.

Ni ma na gode, Maikatanga.